Sauda - med sans for heimebaserte løysingar

Sauda kommune har 4700 innbyggarar og har satsa sterkt på heimebasert omsorg. Frå den første eldreplanen i 1987 har det vore einstemminge politiske vedtak som seier at me skal satsa på heimetenester. Stikkord er; individuelle tenester, folk skal få bu heime så langt råd er, rehabiliteringstanken, fleksibel og differensiert teneste, skilje mellom bustad og tenester, døgntryggleik og gode aktivitetstilbod. Det som var av institusjonsplassar er ombygd og definert som omsorgsbustader og alt som er bygd nytt dei siste 8 åra er omsorgsbustader med fellesareal/bufellesskap. Både demente og funksjonshemma bur i bufellesskap med fellesareal og fast personale. Ingen skal bu på sjukeheim over lang tid. Det viktigaste er å ha nok personellressursar og god kompetanse i bufellesskapa slik at brukarane føler seg trygge. For kommunen er det og ei rimelegare løysing enn å satsa på institusjonsdrift. I tillegg kjem dei aller fleste brukarane betre ut av det økonomisk ved å bu i omsorgsbustad enn på sjukeheim.

Dei siste 8 åra har kommunen berre hatt 9 institusjonsplassar. Dette er korttidsplassar som er brukt til avlasting, rehabilitering, overgangspleie etter sjukehusopphald og alvorleg sjuke og døyande. Det har medført at me klarer å ta i mot pasientar som er utskrivingsklare frå sjukehus fort. 

Alle sjukepleiarane er tilsett i same eining og skal yta tenester til brukarane etter behov. Det har ført til at denne ressursen vert nytta godt og at sjukepleiarane får utfordrande og relevante oppgåver. Dei får og eit fagleg og sosialt fellesskap som er viktig å ta vare på. Modellen er positiv fordi ein lett rekrutterer nye/ unge sjukepleiarar, men den set og høgare krav til dei andre tilsette i einingane.

Ein er nå i ferd med å bygga opp Sauda Distriktsmedisinske Senter i lag med Helse Fonna. 5. februar i år opna 11 kommunale korttidssenger og etter planen skal Helseforetaket i gong med observasjonssenger om ikkje lenge. Det gjer at særleg eldre og kronikarar får eit betre helsetilbod her i Sauda og slepp å reisa i fleire timar til næraste sjukehus. Samarbeid mellom helseforetaka og kommunane er avgjerande for å få til gode og heilskaplege løysingar for brukarane både no og i framtida. Det er  viktig å satsa på forskjellige modellar for samarbeid ut frå dei behova ein har.

Pleie- og omsorgsplanen skal no reviderast. Det gjenstår å sjå om Sauda vidarefører den heimebaserte lina ein no har lagt seg på. Men me dei erfaringane ein har gjort seg er det gode grunnar for dette, både for brukarane, dei tilsette og i høve til økonomien.

For mer informasjon ta gjerne kontakt med Aslaug Tangeraas (aslaug.tangeraas@sauda.kommune.no)